Ick bün 1929 in Flensborg op de Welt kaam'n, bün dor to School gahn un later Koopmann lehrt. Un mien Kinner - twee Deerns un twee Jungs - sünd ok in Flensborg geborn un opwussen. Ick weer mit'n nette Flensborger Deern verheirod, mien Froo müss mi 1995 nah'n swoore Hartoperatschoon verlaaten. Mien Beroop föhrt mi 1960 nah Rendsborg - intwüschen bün ick to de domolige Düütsche Bundesbahn wesselt - un vun dort 1973 an heff ick mien Deenst in Hamborg maakt un heff dor ok waahnt. Siet 1998 wahn ick in Travemünde, op de wunnerschöne Halwinsel Priwall.
Ick bün mit de plattdüütsche Spraak opwussen, heff leewer platt- as hoogdüütsch snackt. So bün ick denn al 1950 an de Nedderdüütsche Bühn' Flensborg kaam'n und heff dor eenige Johr'n Theoter speelt. As mi mien Beroop nich mehr de Tied dorto leet, bün ick mit dat Schriewen anfung'n. Un mi is dat glückt, mien irstes Stück "Froonslüüd sünd ok Minschen" wurr 1966 vun't Ohnsorg-Theoter uropfööhrt un vun't Fernsehen öwerdraagen. Intwüschen heff ick söss Theoterstücke un veer Hörspeele rutkaam'n.